കൂനൻ കുരിശ് സത്യം

15-ാം നൂറ്റാണ്ടിന്റെ തുടക്കത്തിൽ കച്ചവടത്തിനായി ഇന്ത്യയിലേയ്ക്കു കടന്നുവന്ന പോർച്ചുഗീസുകാർ, മട്ടാഞ്ചേരിയെ ലോകപ്രശസ്തമായ ഒരു വാണിജ്യ കേന്ദ്രമാക്കി മാറ്റി. അതോടൊപ്പം അവർ ഇന്ത്യയിൽ ക്രൈസ്തവ വിശ്വാസവും പ്രചരിപ്പിച്ചു. വിശ്വാസ പ്രചരണത്തിനായി ഈശോസഭാ മിഷനറിമാരെയും അവർ കൂടെ കൊണ്ടുവന്നു.

വിശുദ്ധ കുരിശിനോടും പരിശുദ്ധ മാതാവിനോടും അത്യധികം വിശ്വാസവും ഭക്തിയും അവർക്കുണ്ടായിരുന്നു. ഈ ലോകജീവിതത്തിന്റെ നിസ്സാരതയും പാരത്രികത്തിന്റെ ശ്രേഷ്ഠതയും ദൈവവചനത്തിലൂടെയും വി. കുരിശിന്റെ സാക്ഷ്യത്തിലൂടെയും വിനയാന്വിതമായ ജീവിതത്തിന്റെ പ്രതീകമായി പൗരസ്ത്യശിൽപകലാ ചാതുരിയിൽ പോർച്ചുഗീസുകാർ മട്ടാഞ്ചേരിയിൽ പണിതുയർത്തിയ ജീവമാതാവിന്റെ (Our Lady of Life) നാമധേയത്തിലുള്ള പള്ളിയും അതിന്റെ കീഴിലുള്ള വി. കുരിശിന്റെ കപ്പേളയും ചരിത്രത്തിന്റെ വഴിത്താരയിൽ ഇന്നും ഉയർന്നു നിൽക്കുന്നു.

കുരിശിലൂടെ ഒന്നിപ്പിക്കപ്പെട്ട ജനം ചില തെറ്റിദ്ധാരണകളുടെ അടിസ്ഥാനത്തിൽ വി. കുരിശ് നൽകിയ ജീവിതാദർശങ്ങൾ മറന്ന് ഭിന്നിപ്പിക്കപ്പെട്ടു. ഈശോസഭാ മിഷനറിമാരെ തങ്ങൾ അംഗീകരിക്കില്ലെന്നു പറഞ്ഞ് കുരിശിൽ കെട്ടിയ ആലാത്തിൽ പിടിച്ച് 1653 ജനുവരി 3-ന് അവർ നടത്തിയ സത്യമാണ് കൂനൻ കുരിശ് സത്യം. ഈ സംഭവം ഇന്ന് ചരിത്രത്തിന്റെ ഭാഗമായിത്തീർന്നിരിക്കുന്നു. വലിയ ഒരു ജനക്കൂട്ടം കുരിശിൽ കെട്ടിയ കയറിൽ പിടിച്ചു വലിച്ചപ്പോൾ കുരിശ് അല്പം ചരിഞ്ഞെന്നും (കൂനൻ കുരിശ്) പിന്നീടത് നേരെയാക്കി സ്ഥാപിച്ചെന്നും പറയപ്പെടുന്നു. ഇത് ചരിത്രത്തിന്റെ ഭാഗമായി തീർന്നിരിക്കുന്നു.

കൊച്ചിയിലുണ്ടായിരുന്ന ആദ്യ ക്രൈസ്തവ സമൂഹം ഭിന്നിച്ചു പിരിഞ്ഞുവെങ്കിലും കടൽ കടന്നെത്തിയ കച്ചവടക്കാർക്കും സ്വദേശികളായ വ്യാപാരികൾക്കും വി. കുരിശ് എന്നും സംരക്ഷണ കേന്ദ്രമായി തീർന്നിരുന്നു.