വിശുദ്ധ കുരിശ്, മട്ടാഞ്ചേരി

പാതയോരത്ത് നാട്ടപ്പെട്ട കുരിശ് വ്രാന്തകുരിശ് (പോർച്ചുഗീസ്) വാണിജ്യ വ്യവസായങ്ങൾക്കുവേണ്ടി കൊച്ചിയിൽ വന്നവർക്ക് എന്നും അഭയമേകി. ഒരു നിമിഷമെങ്കിലും കുരിശിൻ നടയിൽ കയറി അവർ ആശ്വാസം കണ്ടെത്തിയിരുന്നു. അക്കാലത്ത് മട്ടാഞ്ചേരിയിലെ ഒരു വ്യാപാരിയുടെ പക്കൽ നിന്ന് ഒത്തിരിയേറെ സാധനങ്ങൾ കളവുപോയി. എല്ലാം നഷ്ടപ്പെട്ട ആ മനുഷ്യൻ കുരിശിൻ നടയിൽ ഇരുന്നു പ്രാർത്ഥിക്കുവാൻ തുടങ്ങി. ദിവസങ്ങൾക്കു ശേഷം ഒരു വ്യക്തി മാനസികാസ്വാസ്ഥ്യം നേരിട്ട് കുരിശിൻ നടയിൽ വന്ന് തന്റെ അറിവില്ലായ്മ നിമിത്തം സംഭവിച്ച തെറ്റിനു മാപ്പപേക്ഷിച്ചു; സാധനങ്ങൾ തിരിയെ ഏൽപ്പിച്ചു.

അന്നു മുതൽ വി. കുരിശിനോടുള്ള ഭയഭക്തി ആദരവുകൾ വിശ്വാസികളിൽ വർദ്ധിക്കുകയും വ്രാന്തകുരിശ് "ഭ്രാന്തൻ കുരിശാകുകയും" പിന്നീട് "കുരിയച്ചനായി" തീരുകയുമാണുണ്ടായത്. ഇന്നും ആ വിശ്വാസത്തിന്റെ തണലിൽ അനേകായിരങ്ങൾ അവരുടെ തകർന്ന കുടുംബങ്ങൾക്കും മനസ്സുകൾക്കും അനാഥത്വത്തിനും ആശ്വാസം തേടി ഇവിടെ എത്തുകയാണ്.